Bəyannamənin təqdim olunmamasına görə maliyyə sanksiyası necə hesablanır?

Vergi Məcəlləsinin 57.1-ci maddəsinə əsasən, hesabat dövrü üzrə vergi tutulan və ya vergidən azad edilən (vergiyə cəlb edilməyən) əməliyyatlar aparan, vergitutma obyektləri olan vergi ödəyicisi tərəfindən vergi hesabatının əsas olmadan müəyyən edilən müddətdə təqdim edilməməsinə görə vergi ödəyicisinə vergi orqanının rəhbərinin (onun müavininin) qərarına əsasən 40 manat məbləğində maliyyə sanksiyası tətbiq edilir.
Misal 1. 2023-cü ilin 2-cü rübü üzrə Sadələşdirilmiş vergi bəyannaməsini 30 iyul 2023-cü il tarixdə təqdim etdiyi halda vergi ödəyicisinə 40 manat məbləğində maliyyə sanksiyası tətbiq edilir.
Misal 2. Gəlir (mənfəət) vergisi ödəyicisi olan şəxs 2021-ci ildə hər hansı əsas vəsaitə malik olmayıb. 2022-ci ilin sonuna vergi ödəyicisinin əmlakı olmasına baxmayaraq bu haqda vergi orqanına bəyannamə təqdim etməyib. 2023-ci ilin may ayında vergi nəzarəti tədbirləri nəticəsində qeyd edilən hal aşkar edildikdə 2021-cü il üzrə vergi ödəyicisinin əmlak vergisi mükəlləfiyyəti yaranmadığı üçün maliyyə sanksiyası tətbiq edilməyəcək. Amma 2022-ci il üzrə əmlak vergisi bəyannaməsi 31 mart 2022-ci il tarixinə kimi təqdim olunmadığı üçün Vergi Məcəlləsinin 57.1-ci maddəsinə görə 40 manat maliyyə sanksiyası tətbiq olunacaq.
Misal 3. Vergi ödəyicisi 2021-ci ilin 3-cü rübü üzrə Muzdlu işlə əlaqədar ödəmə mənbəyində tutulan vergi, məcburi dövlət sosial sığorta, işsizlikdən sığorta və icbari tibbi sığorta haqları bəyannaməsi (hesabatı) və Sadələşdrilmiş vergi bəyannaməsini təqdim etməyib. Bu halda vergi ödəyicisinə hər bəyannamə növü üzrə ayrı maliyyə sanksiyası hesablanacaq. Vergi orqanı Vergi Məcəlləsinin 57.1-ci maddəsinə uyğun olaraq vergi ödəyicisinə 80 manat (40 manat x 2) maliyyə sanksiyası tətbiq edəcək.
Misal 4. Mənfəət (gəlir) vergisi ödəyicisi 15 oktyabr 2022-ci il tarixdə fəaliyyətini müvəqqəti dayandırıb. Vergi qanunvericiliyinə əsasən, mənfəət (gəlir) vergisi ödəyicisi fəaliyyətini dayandırdıqda, habelə vergi ödəyicisinin fəaliyyətinə xitam verildikdə 30 gün müddətində vergi orqanına bəyannamə verməlidir. Vergi ödəyicisinə hesabatın 15 noyabr 2022-ci il tarixdən gec təqdim edilməsinə görə Vergi Məcəlləsinin 57.1-ci maddəsinə əsasən 40 manat maliyyə sanksiyası tətbiq ediləcək.