Direktorun ezamiyyətə getməsi necə rəsmiləşdirilməlidir? (Nümünəvi forma)

Ezamiyyətdə olan direktorun səlahiyyətlərini mütləq işçilərdən hansısa icra etməlidir. “Məzuniyyətlər” bölməsində əmək məzuniyyətinə çıxan direktorun səlahiyyətlərinin ötürülməsi ilə bağlı geniş məlumat verdiyimizdən təkrarçılıqdan qaçmaq üçün bu bölmədə həmin prosedurlara toxunmayacağıq, yalnız sənədlərin nümunəvi formalarını təqdim edəcəyik. Çünki məzuniyyətə və ezamiyyətə gedən direktorun vəzifə səlahiyyətlərinin başqa işçiyə ötürülməsinin prosedur qaydası eynidir.

Direktorun xidməti ezamiyyətə getməsi barədə əmri elə direktorun özü imzalamalıdır. Belə əmrin nümunəvi forması növbəti səhifədəki kimidir:



Blank “Alov” MMC

ƏMR

№________



Qazax şəhəri ____ __________________ 2019-cu il

Direktorun xidməti ezamiyyətə getməsi haqqında

Hazır məhsulun alıcısı ilə müqavilə şərtlərinin razılaşdırılaraq imzalanması məqsədilə

ƏMR EDİRƏM:

“Alov” MMC-nin direktoru Nəbili Nüsrət Nadir oğlu Bakı şəhərində yerləşən “Atəş” MMC ilə alğı-satqı müqaviləsinin imzalanması məqsədi ilə 13 avqust 2019-cu il tarixdən 18 avqust 2019-cu il tarixinə kimi, 6 (altı) gün müddətinə Bakı şəhərinə ezam olunsun.
Direktorun xidməti ezamiyyət xərclərinin smetası təsdiq olunsun (Smeta əmrə əlavə olunur).
Baş mühasib Səlimova Sultanə Sabir qızı ezamiyyə xərclərinin smetasına uyğun olaraq Nəbili Nüsrət Nadir oğluna avans pulunun ödənilməsini həyata keçirsin.
Əmrin icrasına nəzarət Kadrlarla iş şöbəsinin müdiri Ağazadə Nazlı Həsənağa qızına həvalə olunsun.


Qoşma: Ezamiyyət xərclərinin smetası, 1 vərəq, 1 nüsxə.

Direktor ________ Nəbili N.N.

Əmrlə tanış oldum:

Baş mühasib___________Səlimova S.S.

Tarix: _____ _____________

—————————————————————————