Vergi borcu üzrə faiz hesablanmasında müddət necə nəzərə alınır?

Vergi Məcəlləsinin 59.2-ci maddəsinə əsasən, bu Məcəllənin 59.1-ci maddəsində müəyyən edilmiş faiz vergi ödənişlərinə münasibətdə bütün ötmüş müddətə, ancaq bir ildən çox olmamaq şərti ilə tətbiq edilir.

Maddədən göründüyü kimi vergi orqanı tərəfindən vergi borclarına hesablanan faizlərə 1 il maksimum müddət müəyyən edilib. Bir məsələni qeyd edək ki, faizin hesablanması zamanı təqvim ili deyil, ardıcıl 12 ay əsas götürülür.

Mİsal. Vergi ödəyicisinin 2020-ci ilin 3-cü rübü üzrə təqdim etdiyi sadələşdirilmiş vergi bəyannaməsi üzrə 1200 manat vergi borcu yaranıb. Vergi ödəyicisi həmin məbləği oktyabr ayının 20-dən gec olmayaraq ödəmədiyi halda, həmin vergi borcuna 21 oktyabr 2020-ci il tarixdən bir il müddətinə faiz hesablanması davam edir. Bu halda vergi orqanı 22 oktyabr 2021-ci il tarixdə faiz hesablanmasını həyata keçirməyəcək.