Əlilliyi olan şəxslər üçün gəlir vergisi güzəşti hansı hallarda tətbiq olunur?

Əlilliyi olan şəxslər üçün gəlir vergisi güzəşti hansı hallarda tətbiq olunur?




Əlilliyi müəyyən edilmiş şəxslərin əlillik dərəcələri orqanizmin funksiyalarının pozulma səviyyəsinə əsasən müəyyən edilir və I, II və III dərəcə üzrə müvafiq olaraq 81–100 faiz, 61–80 faiz və 31–60 faiz təşkil edir.

Vergi Məcəlləsinin 102.3-cü maddəsinə əsasən, orqanizmin funksiyalarının 61–100 faiz pozulmasına görə əlilliyi müəyyən edilmiş şəxslərin (müharibə ilə əlaqədar əlilliyi müəyyən edilmiş şəxslər istisna olmaqla), habelə 18 yaşınadək əlilliyi müəyyən edilmiş şəxslərin hər hansı muzdlu işdən əldə etdikləri aylıq vergi tutulmalı gəlirləri 200 manat məbləğində azaldılır.

Eyni zamanda, daimi qulluq tələb edən 18 yaşınadək əlilliyi müəyyən edilmiş şəxsə və ya orqanizmin funksiyalarının 81–100 faiz pozulmasına görə əlilliyi müəyyən edilmiş şəxsə baxan və onunla birlikdə yaşayan valideynlərdən (o cümlədən övladlığa götürən şəxslərdən) birinin, eləcə də arvadın (ərin), himayəçinin və ya qəyyumun aylıq vergi tutulmalı gəliri də 200 manat məbləğində azaldılır.

Əsas: Azərbaycan Respublikasının Vergi Məcəlləsinin 102.3-cü maddəsi