Səyyar vergi yoxlamasının müddəti neçə gün artırılacaq?

Kameral vergi yoxlaması ilə yanaşı, səyyar vergi yoxlamasının da müddəti artırılıb. Son dəyişiklik nəticəsində Vergi Məcəlləsinin 38.2-ci maddəsinin birinci hissəsinin üçüncü və dördüncü cümlələrində və ikinci hissəsində ismin müvafiq hallarında “gün” sözü ismin müvafiq hallarında “iş günü” sözləri ilə əvəz edilib. Belə ki, artıq səyyar vergi yoxlaması 30 təqvim günü yox, 30 iş günündən artıq davam edə bilməz. Müstəsna hallarda, yuxarı vergi orqanının qərarına müvafiq olaraq səyyar vergi yoxlamasının keçirilməsi müddəti 90 təqvim günü yox, 90 iş gününə qədər artırıla bilər. Həmçinin, Vergi Məcəlləsinin 38.2-ci maddəsində müəyyən edilən hallarda yuxarı vergi orqanının əsaslandırılmış qərarına əsasən səyyar vergi yoxlamasının nəticələri üzrə aktın tərtibi müddəti 30 təqvim günü yox, 30 iş günündən çox olmayan müddətə uzadıla bilər.
Yenilənmiş maddədən göründüyü kimi, vergi orqanı tərəfindən vergi ödəyicisində həyata keçirilən səyyar vergi yoxlamasının müddətinin tavan həddi 30 təqvim günü yox, 30 iş günü müəyyən edilib. Həmçinin, müstəsna hallarda səyyar vergi yoxlamasının müddəti 90 iş gününə qədər artırıla bilər ki, bu da müddətin artıq 3 ay yox, təxminən 4,5 aya qədər davam etməsi anlamına gəlir.