İşdən çıxan işçinin vəzifəsi ixtisar olunarsa, onun yenidən qayıtmaq hüququ qüvvədə olur?

Təcrübədə rast gəlinən hallardan biri də, əmək müqaviləsinə xitam verilən işçinin vəzifəsinin ixtisar olmasıdır.

Mİsal. İşçi 14 fevral 2022-ci il tarixdə ərizə yazaraq 21 fevral 2022-ci ildə işdən azad olunmasını xahiş edir. İşəgötürən işçini həmin tarixdə işdən azad edir, amma həmin vəzifənin ixtisar olunacağını əsas tutaraq, həmin vəzifəyə (peşəyə) yeni işçinin götürülməsi barədə əmək müqaviləsinə xitam verilən işçiyə rəsmi qaydada yazılı xəbərdarlıq etmir. İşçi 1 mart 2022-ci il tarixdə işəgötürənə müraciət edir ki, ərizə tarixindən bir ay müddət keçmədiyi üçün onun vəzifəsinə qayıtmasını təmin etsin.

Ştatların ixtisarı və yenilərinin açılması işəgötürənin hüququdur, ancaq işəgötürən işçini rəsmi xəbərdar etmədiyi üçün, onu əvvəlki vəzifəsinə bərpa etməlidir və ya işçiyə yeni vəzifə təklif etməlidir. Təcrübədə rast gəlinir ki, işəgötürən məhkəmə qərarı ilə işçini ixtisar olunan vəzifəyə bərpa edir. İşəgötürən yenə də qərarlıdır ki, həmin vəzifənin ixtisarına ehtiyac var, bu zaman Əmək Məcəlləsinin 77-ci maddəsində nəzərdə tutulan təminatları ödəməklə işçinin vəzifəsini ixtisar edir və əmək müqaviləsinə xitam verir.