ƏDV ödəyicilərinə maliyyə sanksiyası nəzərdə tutan maddədəki müddət artırılacaq? (5-ci yazı)

1 yanvar 2023-cü il tarixdən Vergi Məcəlləsində edilməsi nəzərdə tutulan dəyişikliklərin şərhi

Hazırda Dövlət Vergi Xidməti Vergi Məcəlləsində dəyişiklikləri nəzərdə tutan paketin müvafiq dövlət qurumları ilə müzakirəsini həyata keçirir.

1 yanvar 2023-cü il tarixdən Vergi Məcəlləsində təklif edilən dəyişikliklərin əksəriyyəti vergi ödəyicilərinin xeyrinə olan dəyişikliklərdir. Vergi Məcəlləsinin 58.6-ci maddəsinə əsasən, bu Məcəllənin 175.1.3-cü maddəsinə müvafiq olaraq bu Məcəllənin 175.8-ci maddəsində göstərilən vergi ödəyicisi tərəfindən malların (iş və xidmətlərin) dəyəri ödənilən gündən gec ƏDV məbləğinin ödənilməsinə görə vergi ödəyicisinə vaxtında ödənilməmiş ƏDV məbləğinin 50 faizi miqdarında maliyyə sanksiyası tətbiq edilir. Göründüyü kimi, hazırda əsas məbləğlə ƏDV-nin ödənilməsində hətta bir günlük gecikmə olduğu halda vergi ödəyicisinə maliyyə sanksiyası tətbiq edilir.

Maraqlıdır ki, 1 yanvar 2023-cü ildən Vergi Məcəlləsində edilməsi nəzərdə tutulan dəyişikliklərdə ƏDV-nin ödənilməsi ilə bağlı vergi ödəyicilərinə daha uzun müddət verilməsi nəzərdə tutulur. Belə ki, Vergi Məcəlləsinin 58.6-ci maddəsinə təklif edilən dəyişikliyə əsasən, ƏDV ödəyiciləri malların (iş və xidmətlərin) dəyəri ödənilən gündən bir iş günü müddətində ƏDV məbləğini ödəmədikləri halda onların maliyyə sanksiyasına məruz qalması nəzərdə tutulur.

Dəyişikliklər paketində Vergi Məcəlləsinin 58.6-cı maddəsi aşağıdakı redaksiyada təklif edilir:

58.6. bu Məcəllənin 175.1.3-cü maddəsinə müvafiq olaraq bu Məcəllənin 175.8-ci maddəsində göstərilən vergi ödəyicisi tərəfindən malların (iş və xidmətlərin) dəyəri ödənilən gündən bir iş günü müddətində ƏDV məbləğinin ödənilməməsinə görə vergi ödəyicisinə vaxtında ödənilməmiş ƏDV məbləğinin 50 faizi miqdarında maliyyə sanksiyası tətbiq edilir.