İşğaldan azad edilmiş ərazilərdə fərqli vergitutma tətbiq ediləcək? (8-ci yazı)

1 yanvar 2023-cü il tarixdən Vergi Məcəlləsində edilməsi nəzərdə tutulan dəyişikliklərin şərhi

Hazırda Dövlət Vergi Xidməti Vergi Məcəlləsində dəyişiklikləri nəzərdə tutan paketin müvafiq dövlət və özəl qurumları ilə müzakirəsini həyata keçirir.

1 yanvar 2023-ci il tarixdən Vergi Məcəlləsinə işğaldan azad edilmiş ərazilərdə tətbiq edilən vergitutma ilə bağlı yeni fəsil təklif olunur. Yeni - XIX fəsilin “İşğaldan azad edilmiş ərazilərdə tətbiq edilən vergitutmanın xüsusiyyətləri” adlandırılması nəzərdə tutulur. Vergi Məcəlləsinə təklif olunan 227.1-ci maddəyə əsasən, işğaldan azad edilmiş ərazinin rezidentləri 2023-cü il yanvarın 1-dən etibarən 10 il müddətində mənfəət (gəlir), əmlak, torpaq və sadələşdirilmiş vergidən azad olacaqlar. Həmçinin, 227.2-ci maddəyə əsasən, ƏDV-nin məqsədləri üçün qeydiyyatda olan işğaldan azad edilmiş ərazinin rezidentləri tərəfindən siyahısı müvafiq icra hakimiyyəti orqanının müəyyən etdiyi orqanı (qurumu) tərəfindən təsdiq edilmiş istehsal fəaliyyəti sahələri üzrə xammal və materialların idxalının 2023-cü il yanvarın 1-dən etibarən 10 il müddətində ƏDV-dən azad olması təklif edilir.