Ezamiyyətə gedən işçinin normadan artıq xərcləməsi necə tənzimlənməlidir?

Təcrübədə rast gəlinən hal ezamiyyətə gedən işçinin normadan artıq xərcləməsi halıdır. Misal üçün, xarici ölkəyə ezamiyyətə gedən işçiyə ödənilən Nazirlər Kabinetinin qərarına uyğun ezamiyyə xərci ödənilib. İşçi Nazirlər Kabinetinin qərarından artıq mehmanxana xərci ödəyirsə və həmin xərc təsdiqedici sənədlə təsdiq edildiyi halda, artıq ödənilən məbləğ işçinin gəlirinə aid edilməlidir?
Dövlət Vergi Xidmənin açıqlamasını təqdim edirik:
Cavab: Bildiririk ki, işçiyə qanunvericiliklə müəyyən edilmiş norma daxilində ödənilən ezamiyyə xərclərinin məbləği gəlir vergisindən azaddır. Ezamiyyə xərclərinin faktiki məbləği qanunvericiliklə müəyyən edilmiş normadan artıq olduğu halda faktiki ezamiyyə xərclərinin əvəzi xərclərin çəkilməsini təsdiq edən sənədlər əsasında ödənilərsə, bu qaydada ödənilmiş ezamiyyə xərci fiziki şəxsin vergi tutulan gəlirinə aid edilmir. Qanunvericiliklə müəyyən edilmiş normadan artıq ödənilən faktiki ezamiyyə xərclərinin məbləği müvafiq sənədlərlə təsdiq edilmədiyi halda, həmin xərclərin qanunvericiliklə müəyyən edilmiş normadan artıq olan hissəsi işçinin vergiyə cəlb olunan gəlirinə aid edilir.

Əsas: Vergi Məcəlləsinin 98.3-cü, 102.1.14.2-ci maddələri, Azərbaycan Respublikası Nazirlər Kabinetinin “Ezamiyyə xərclərinin normaları haqqında” 25 yanvar 2008-ci il tarixli 14 nömrəli Qərarı və Azərbaycan Respublikası Maliyyə Nazirliyinin 18 yanvar 2012-ci il tarixli Q-01 nömrəli Qərarı ilə təsdiq edilmiş “İşçilərin Ezamiyyə Qaydaları”.