İşsizlikdən sığorta hansı gəlirlərə şamil olunur?

İşsizlikdən sığorta məbləğinin hansı gəlirlərə şamil olunmasına gəlincə, qanunda qeyd olunur ki, əməyin ödənişi fondunun 0,5 faizi qədər işsizlikdən sığorta haqqı hesablanır.

Əmək Məcəlləsinin 154-cü maddəsində qeyd edilir ki, əmək haqqı müvafiq iş vaxtı ərzində əmək funksiyasını yerinə yetirmək üçün əmək müqaviləsi ilə müəyyən edilmiş, işçinin gördüyü işə (göstərdiyi xidmətlərə) görə işəgötürən tərəfindən pul və ya natura formasında ödənilən gündəlik və ya aylıq məbləğ, habelə ona edilən əlavələrin, mükafatların və digər ödənclərin məcmusudur.

Əmək haqqının tərkibinə aylıq tarif (vəzifə) maaşı, əlavələr və mükafatlar daxildir:

- Tarif (vəzifə) maaşı — işin mürəkkəbliyi, əməyin gərginliyi və işçinin ixtisas səviyyəsinə görə müəyyən edilən əmək haqqının əsas hissəsidir;

- Əmək haqqına əlavə — əmək şəraiti ilə əlaqədar əvəz ödəmək və ya həvəsləndirmək məqsədi ilə işçinin tarif (vəzifə) maaşına, əmək haqqına müəyyən edilən əlavə ödəncdir;

- Mükafat — əməyin kəmiyyət və keyfiyyətinin yüksəldilməsinə işçinin maddi marağının artırılması məqsədi ilə əmək haqqı sistemində nəzərdə tutulan qaydada və formada verilən həvəsləndirici pul vəsaitidir.

Bu siyahıda olan bütün gəlirlər əməyin ödənişi fonduna aiddir və işçinin iş yerində əldə etdiyi bu gəlirlər işsizlikdən sığortaya cəlb olunur.