Nəzarət kassa aparatlarına görə maliyyə sanksiyası necə hesablanacaq?

Dövlət Vergi Xidməti suala aydınlıq gətirir

Sual: Vergi orqanının operatov vergi nəzarətinin keçirilməsi haqqında qərarına uyğun olaraq vergi ödəyicisinin sahibkarlıq fəaliyyəti ilə məşğul olduğu 3 təsərrüfat subyektində eyni gündə operativ vergi nəzarəti tədbiri həyata keçirilmiş və hər 3 obyekt üzrə nöqsan aşkar edilərək nəticəsi barədə “Nağd pul hesablaşmalarının aparılması qaydalarına riayət olunması vəziyyəti haqqında” aktlar tərtib edilmişdir Həmin aktlar üzrə “Vergi ödəyicisinin vergi qanunvericiliyinin pozulmasına görə məsuliyyətə cəlb edilməsi haqqında” qərarlar qəbul ounarkən vergi ödəyicisinə təqvim ili ərzində birinci dəfə nağd pul hesablaşmalarının aparılması qaydalarının pozulması kimi yanaşılaraq 1000 manat yoxsa təqvim ili ərzində birinci, ikinci və üçüncü dəfə nağd pul hesablaşmalarının aparılması qaydalarının pozulması kimi yanaşılaraq 10000 (1000, 3000, 6000) manat məbləğində maliyyə sanksiyası tətbiq olunmalıdır?

Cavab: Bildiririk ki, vergi orqanının operativ vergi nəzarətinin keçirilməsi haqqında qərarına uyğun olaraq vergi ödəyicisinə məxsus bir və ya bir neçə təsərrüfat subyekti üzrə operativ vergi nəzarəti həyata keçirildikdə həmin təsərrüfat subyektlərində aşkar olunmuş Vergi Məcəlləsinin 50.1.3-cü maddəsinə əsasən eyni hal üzrə qanun pozuntularına il ərzində birinci dəfə yol verilən pozuntu halı kimi baxılır. Buna əsasən, hər bir təsərrüfat subyekti üzrə aşkar olunan pozuntu hallarına müvafiq qaydada rəsmiləşdirilməklə il ərzində birinci hal kimi yanaşılmalı və vergi ödəyicisinə hər bir təsərrüfat subyekti üzrə Vergi Məcəlləsinin 58.7-ci maddəsinə uyğun olaraq 1000 manat məbləğində maliyyə sanksiyası tətbiq edilməlidir. Yuxarıda qeyd olunanlar Vergi Məcəlləsinin 50-ci və 58-ci maddələri ilə tənzimlənir.