Kassa aparatlarının alışı artıb.

2022-ci il ərzində Azərbaycana 11749,54 min ABŞ dolları dəyərində 64 027 ədəd kassa aparatı idxal edilib.Bu kateqoriya məhsul üzrə ölkəyə dəyər ifadəsində ən çox idxal Çindən olunub. Bu ölkədən ötən il 9 985,26 min dollar dəyərində 62 861 ədəd kassa aparatları idxal edilib ki, bu da 2021-ci ilin eyni göstəricilərini müvafiq olaraq 48,9 və 47,5 faiz üstələyir.

Dəyər və həcm ifadəsində ikinci ölkə isə Rusiya olub. Bu ölkədən 2022-ci il ərzində Azərbaycana 1194,3 min dollarlıq 510 ədəd kassa aparatları tədarük edilib ki, bu da bir il öncəki eyni göstəricilərlə müqayisədə dəyər olaraq 71,2 faiz, say baxımından isə 76,3 faiz azdır.

Üçüncü yerdə olan Macarıstandan isə ötən il 240,35 min dollar dəyərində 283 ədəd kassa aparatları göndərilib ki, bu da illik ifadədə dəyər və say baxımından müvafiq olaraq 3,8 və 3,7 dəfə çoxdur.

İl ərzində ümumilikdə Azərbaycana 12 ölkədən kassa aparatları idxal olunub.

Azərbaycandan isə 38,45 min dollar dəyərində 72 ədəd kassa aparatları ixrac edilib. İxracın həcmi illik ifadədə dəyər olaraq 40 faiz, say baxımından isə 88,5 faiz azalıb. Cihazlar əsasən Çinə, Çinin xüsusi inzibati rayonu Honkonqa, Gürcüstana və Sinqapura göndərilib.