Məzuniyyətdə olan işçinin işdənçıxma ərizəsi yazdıqda proses necə tənzimlənməlidir?

Həmkarlarımızı maraqlandıran məsələlərdən biri də, məzuniyyətdə olan işçinin işdənçıxma ərizəsini yazmasıdır. Çünki əmək qanunvericiliyi məzuniyyətdə olan işçinin əmək müqaviləsinə işəgötürən tərəfindən xitam verilməsini, intizam tənbehi elan edilməsini və s. halları qadağan edir.
Əmək Məcəlləsində məzuniyyətdə olan işçinin tərəflərin hüquq və vəzifələrindən irəli gələn hər hansı məsələ ilə əlaqədar müraciətini qadağan edən norma müəyyən olunmayıb. Məzuniyyətdə olan işçi ilə əmək münasibətləri davam etmiş sayılır və o Əmək Məcəlləsinin 9-12-ci maddələrində müəyyən edilmiş tərəflərin hüquq və vəzifələri ilə bağlı məsələlərlə əlaqədar (o cümlədən, əmək müqaviləsinə xitam verilməsi) ərizə ilə işəgötürənə müraciət etmək hüququna malikdir.
Mİsal 1. İşçi 1 fevral 2021-ci il tarixində 14 günlük məzuniyyətə çıxıb və 8 fevral 2022-ci il tarixdə isə işəgötürənə müraciət edir ki, 10 mart 2022-ci il tarixdən onu işdən azad etsin. İşçi məzuniyyətdə olmasına baxmayaraq, işəgötürən onun göndərdiyi ərizəni hüquqi qüvvəsi olduğundan qəbul etməlidir.
Mİsal 2. İşçi məzuniyyətdə olduğu zaman ərizə ilə müraciət edərək 15 gündən sonra işdən çıxmaq istədiyini bildirir. İşəgötürən işçinin həmin tarixdə işdən azad olunmasına etiraz etməsə də, işçini məzuniyyətdə olduğu tarixdə işdən azad edə bilməz. Bu halda işçinin əmək müqaviləsinə xitam verilməsi üçün onun məzuniyyətdən geri qayıtmasını gözləməli və ya tərəflərin razılığı ilə işçinin məzuniyyətdən geri çağırılmasını təmin etməlidir. Çünki Əmək Məcəlləsinin 83-cü maddəsinin 2-ci hissəsinə əsasən işçinin işdən çıxdığı gün iş günü hesab edildiyi üçün, məzuniyyətdə olan işçinin əmək müqaviləsinə xitam verilməsi üçün onun işdə olması zəruridir.