İşçi aliment ödəyirsə və ya aliment alırsa, həmin məbləğ üzrə gəlir vergisi necə hesablanır?

Vergi Məcəlləsinin tələblərinə görə, (maddə 102.1.5) alimentlər gəlir vergisindən azad olsa da, burda bir məqama diqqət yetirməliyik ki, alimenti ödəyən şəxs yox, onu alan şəxs həmin alimentin məbləği qədər gəlir vergisindən azaddır.

Mİsal. İşçinin aylıq əmək haqqı 100 manatdır. İşçi boşandığına görə ayda 40 manat aliment alır. Aliment onun iş yerinə ödənilir. Bu zaman işçinin aylıq gəliri 140 manat olsa da, onun 100 manatı gəlir vergisinə cəlb olunacaq.

Aliment məsələsində bir maraqlı məqam da onun necə hesablanıb ödənilməsilə bağlıdır.

Mİsal. Məhkəmə işçinin aylıq əmək haqqından 25% aliment tutub ödənilməsi haqda qərar çıxarıb. Dövlət müəssisəsində çalışan işçinin aylıq əmək haqqı əsas iş yerində 250 manatdır. Burada sual yaranır ki, aliment hansı məbləğdən - 250 manatdan, yoxsa vergilər tutulduqdan sonra qalan məbləğdən hesablanmalıdır?

Qaydalara əsasən, aliment vergi tutulduqdan sonra ödənilməlidir. Əvvəlcə 250 manatdan 7,0 manat gəlir vergisi ((250 manat – 200 manat) x 14 %), 7,5 manat sosial ayırma (250 manat x 3%) və 1,25 manat icbari sığorta (250 manat x 0.5%) tutulduqdan sonra yerdə qalan 234.25 manatın (250 manat -7,0 manat - 7,5 manat -1,25 manat) 25%-i hesablanmalı və 58,56 manat (234,25 manat x 25%) aliment kimi ödənilməlidir.