Vergi ödəyicisi səhhəti ilə əlaqədar vergi orqanına bəyannamə təqdim etmədikdə, maliyyə sanksiyası hesablanır?

Sual: Sadələşdirilmiş vergi ödəyicisiyəm. Səhhətimlə əlaqədar son iki rüb ərzində heç bir fəaliyyətim və gəlirim olmadığı üçün müvafiq hesabatları vergi orqanına təqdim etməmişəm. Hesabatın vaxtında təqdim edilməməsi barədə vergi orqanının xəbərdarlığı elektron kabinetimə daxil olub. Boş hesabatları indi təqdim etsəm maliyyə sanksiyası tətbiq olunacaqmı?

Cavab: İqtisadiyyat Nazirliyi yanında Dövlət Vergi Xidmətindən bildirilib ki, Vergi Məcəlləsinin 1 yanvar 2023-cü ildən qüvvəyə minmiş müddəalarına əsasən, hesabat dövrü üzrə vergi tutulan əməliyyatlar aparan vergi ödəyicisi tərəfindən vergi hesabatının təqdim edilməməsinə görə vergi ödəyicisinə vergi orqanının rəhbərinin (onun müavininin) qərarına əsasən 40 manat məbləğində maliyyə sanksiyası tətbiq edilir.
Qeyd olunanlara əsasən, vergi ödəyicisi tərəfindən vergi tutulan əməliyyatlar aparılmadığı halda, müvafiq rüblər üzrə təqdim ediləcək hesabatların vaxtında təqdim olunmamasına görə maliyyə sanksiyasının tətbiq edilməsi Vergi Məcəlləsində nəzərdə tutulmayıb.

Əsas: Vergi Məcəlləsinin 57.1-ci maddəsi