Mərkəzi Banka yeni səlahiyyət verildi

Nazirlər Kabineti 23 dekabr 2000-ci il tarixli qərarı ilə təsdiq edilmiş “Mülki Məcəllənin qəbul edilməsindən irəli gələn bəzi məsələlərin həll edilməsi haqqında” və 13 fevral 2006-cı il tarixli “İpoteka kağızının dövlət qeydiyyatı Qaydaları”nın təsdiq edilməsi haqqında” qərarlarında dəyişiklik edib.

Bununla bağlı Baş nazir Əli Əsədov yeni qərar imzalayıb.

Qərara əsasən, bundan sonra Azərbaycanda maliyyə bazarlarını tənzimləyən qanunlarda nəzərdə tutulmuş hallarda səhmdar cəmiyyətinin nizamnamə kapitalının minimum həddini Azərbaycan Mərkəzi Bankı müəyyən edəcək.

XXX

“Azərbaycan Televiziya və Radio Verilişləri” Qapalı Səhmdar Cəmiyyətinin (QSC) səhmlərinin nominal dəyərinin artırılması və əlavə səhmlərin buraxılması qaydaları Azərbaycan Mərkəzi Bankı tərəfindən müəyyən ediləcək.

Bu barədə Baş nazir Əli Əsədov Nazirlər Kabinetinin 2005-ci il 18 iyun tarixli 106 nömrəli Qərarı ilə təsdiq edilmiş “Azərbaycan Televiziya və Radio Verilişləri” Qapalı Səhmdar Cəmiyyətinin Nizamnaməsi”ndə dəyişiklik edilməsi haqqında qərar imzalayıb.

Bundan öncə QSC-nin səhmlərinin nominal dəyərinin artırılması və əlavə səhmlərin buraxılması qaydalarını Azərbaycan Respublikasının Maliyyə Bazarlarına Nəzarət Palatası müəyyən edirdi.