Ölkəyə elektromobil idxalı artıb

Bu ilin yanvar-noyabr ayları ərzində ölkəyə 111 milyon ABŞ dolları dəyərində 2737 yalnız elektrik mühərriklə hərəkətə gətirilən nəqliyyat vasitələri (elektromobil) idxal edilib.

Dövlət Gömrük Komitəsinin hesabatı əsasında apardığı hesablamalara görə, bu, 2022-ci ilin eyni göstəricilərindən dəyər olaraq 7,7 dəfə və ya 96,7 milyon dollar, say baxımından isə 6,7 dəfə və ya 2328 ədəd çoxdur.

Cari ilin oktyabr ayına nisbətdə isə noyabrda elektromobillərin idxal dəyəri 2,2 faiz və ya 330,25 min dollar artaraq 12,74 milyon dollar, sayı isə 1,6 faiz artaraq 312 ədəd təşkil edib.

Ümumilikdə cari ilin ilk 11 ayında ölkəyə 1,52 milyard dollar dəyərində 88,7 min nəqliyyat vasitəsi idxal edilib. Ötən ilin yanvar-noyabr aylarına nisbətdə bu göstərici müvafiq olaraq 63,3 faiz və 32,7 faiz artıb. Hesabat dövründə avtomobil idxalının strukturunda elektromobillərin payı 3,1 faiz təşkil edib ki, bu da bir il öncəki göstəricidən 2,5 faiz bəndi çoxdur.