YENİ DƏYİŞİKLİK! Malların alışı ilə bağlı çəkilən xərclərin dəyərinin təqdim edilən malların dəyərinin 1,2-yə bölünməsi üsulu ilə hesablanması niyə Məcəllədən çıxarıldı?

Malların alışı ilə bağlı çəkilən xərclərin dəyərinin təqdim edilən malların dəyərinin 1,2-yə bölünməsi üsulu ilə hesablanması niyə Məcəllədən çıxarıldı?



Vergi Məcəlləsinin 58.16-cı maddəsinə edilən dəyişikliyə əsasən, “58.8-ci” sözləri “58.8.2-ci” sözləri ilə əvəz edilib və maddədən ikinci cümlə çıxarılıb. Qeyd edək ki, dəyişikliyə qədər Vergi Məcəlləsinin 58.16-cı maddəsinin ikinci cümləsində qeyd edildirdi ki, alışı bu Məcəllə ilə müəyyən edilmiş qaydada rəsmiləşdirilməyən malların təqdim edilməsinə dair tərtib edilmiş elektron qaimə-fakturalarda mallar barədə məlumatlar, o cümlədən malın adı dəqiq göstərilmədikdə, həmin malların alışı ilə bağlı çəkilən xərclərin dəyəri təqdim edilən malların dəyərinin 1,2-yə bölünməsi yolu ilə alınan dəyər kimi müəyyən edilir.

Maraqlıdır, malların dəyərinin müəyyən edilməsi üçün təklif olunan düstur niyə Vergi Məcəlləsindən çıxarıldı? Vergi Məcəlləsinin 58.8.3-cü maddəsinin ləğvi ilə bağlı izahda qeyd etdik ki, 1 yanvar 2024-cü il tarixdən etibarən vergi ödəyicisinin Qanunla müəyyən edilmiş qaydada rəsmiləşdirilməyən xərclərinin gəlirdən çıxılmasına yol verilməyəcək. Bu səbəbdən də vergi orqanı tərəfindən alışı bu Məcəllə ilə müəyyən edilmiş qaydada rəsmiləşdirilməyən malların təqdim edilməsinə dair tərtib edilmiş elektron qaimə-fakturalarda mallar barədə məlumatlar, o cümlədən malın adı dəqiq göstərilmədikdə, həmin malların alışı ilə bağlı çəkilən xərclərin dəyərinin müəyyən edilməsinə ehtiyac yaranmayacaq.Çünki həmin xərclərə görə Vergi Məcəlləsinin 58.8-ci maddəsinə uyğun olaraq maliyyə sanksiyası tətbiq edilməyəcək və gəlirdən çıxılmasına da icazə verilməyəcək.