Ezamiyyətdə olan işçinin əmək haqqının adi qaydada hesablanması inzibati cərimə məsuliyyəti yaradır?

Ezamiyyətdə olan işçinin əmək haqqının adi qaydada hesablanması inzibati cərimə məsuliyyəti yaradır?



Ezamiyyədə olan işçi şikayət edərsə ki, onun ezamiyyədə olduğu günlərə görə xüsusi hesablama olmayıb, yəni əmək haqqı ümumi qaydada hesablanıb, dövlət qurumu tərəfindən işəgötürənə İnzibati Xətalar Məcəlləsinin 192.4-cü maddəsinə görə inzibati cərimə hesablana bilər?
İnzibati Xətalar Məcəlləsinin 192.4-cü maddəsinə əsasən, işçinin əmək və məzuniyyət haqlarının, ezamiyyə xərclərinin, əmək qanunvericiliyində nəzərdə tutulmuş müavinət və digər ödənişlərin hesablanmasında və ödənilməsində, riyazi hesablamalar nəticəsində yol verilən nöqsanlar istisna olmaqla, qanun pozuntularına yol verilməsinə görə vəzifəli şəxslər yeddi yüz manatdan min beş yüz manatadək məbləğdə cərimə edilir.
İşçi şikayət etdiyi halda Dövlət Əmək Müfəttişliyi Xidməti əmək haqqının düzgün hesablanmamasına görə işəgötürənə İnzibati Xətalar Məcəlləsinin 192.4-cü maddəsinə uyğun inzibati cərimə hesablaya bilər.
Qeyd edək ki, işçiyə ezamiyyə normaları üzrə ödənişlərin düzgün müəyyən edilməməsi də inzibati məsuliyyət yaradır.

Misal. İşçi Gəncə şəhərinə ezam olunmasına baxmayaraq, işəgötürən səhv olaraq ezamiyyə normasını Gəncə şəhəri üçün nəzərdə tutulan 95 manatdan yox, digər rayonlar üçün nəzərdə tutulan 90 manatan hesablayıb. İşçinin şikayəti əsasında ezamiyyə xərclərinin düzgün hesablanmaması aşkar edilərsə, bu zaman dövlət qurumu tərəfindən işəgötürənə 192.4-cü maddəyə uyğun inzibati cərimə hesablana bilər.