Elektron əmtəə-nəqliyyat qaiməsi olmadan malların daşınmasına görə cəriməni hansı qurum tətbiq edə bilər?

Elektron əmtəə-nəqliyyat qaiməsi olmadan malların daşınmasına görə cəriməni hansı qurum tətbiq edə bilər?



“Elektron əmtəə-nəqliyyat qaiməsinin forması, tətbiqi, uçotu və istifadəsi ilə bağlı qaydalar”ın 1.3.-cü bəndində qeyd edilir ki, elektron əmtəə-nəqliyyat qaiməsi ilə rəsmiləşdirilməmiş əmtəə təyinatlı yüklərin daşınmasına yol verilmir. Vergi ödəyicisi elektron əmtəə-nəqliyyat qaiməsi olmadan daşınma edərsə, o zaman qanunvericilik tələbi pozulmuş hesab ediləcək. Malların alqı-satqısı zamanı onların daşınması nəzərdə tutulursa, vergitutma məqsədləri üçün elektron əmtəə-nəqliyyat qaiməsinin mövcud olmaması və ya orada təhrif edilmiş məlumatların olması əməliyyatın əmtəəsiz əməliyyat kimi qiymətləndirilməsinə səbəb ola bilər.
İnzibati məsuliyyətə gəlincə isə, İnzibati Xətalar Məcəlləsinin 323.2-ci maddəsinə əsasən, əmtəə təyinatlı yüklərin elektron əmtəə-nəqliyyat qaiməsi ilə rəsmiləşdirilmədən daşınmasına görə qırx manat məbləğində cərimə edilir. Burda daşınan yüklərin həcmi inzibati cərimə məbləğinə hər hansı təsiri yoxdur. Çünki İnzibatı Xətalar Məcəlləsinin 323.2-ci maddəsində inzibati cərimə sabit məbləğ olaraq 40 manat müəyyənləşdirilib.
Azərbaycan Respublikası Prezidentinin 23 fevral 2017-ci il tarixli, 1256 nömrəli Fərmanı ilə təsdiq edilən “İnzibati xətalar haqqında işlərə baxmağa səlahiyyəti olan vəzifəli şəxslərin siyahısı”nda Azərbaycan Respublikası İnzibati Xətalar Məcəlləsinin 323-cü maddəsi üzrə səlahiyyət Azərbaycan Respublikasının Daxili İşlər Nazirliyinə verilib.
Bu səbəbdən də, yol-patrul xidməti baş inspektorları və inspektorları də elektron əmtəə-nəqliyyat qaiməsi olmayan nəqliyyat vasitəsini 40 manat məbləğində cərimələyə bilər.