İdxal ediləcək mallar barədə məlumat forması vergi orqanına təqdim olunmalıdırmı?

İdxal ediləcək mallar barədə məlumat forması vergi orqanına təqdim olunmalıdırmı?



Şirkətimiz 2025-ci ilin yanvar ayında vergi orqanında qeydiyyata alınıb və idxal edilmiş malların topdan satışını həyata keçirir. Şirkətin vergi orqanlarında uçota alınmış iki təsərrüfat obyekti mövcuddur və idxal edilən mallar həmin təsərrüfat obyektinə boşaldılacaq. Bu halda idxal olunacaq mallar barədə məlumat forması vergi orqanına təqdim edilməlidirmi?

İqtisadiyyat Nazirliyi yanında Dövlət Vergi Xidmətindən bildirilib ki, 2025-ci il yanvarın 1-dən Vergi Məcəlləsinin 16.1.11-11-ci maddəsində edilmiş dəyişikliklərə əsasən, vergi ödəyiciləri tərəfindən idxal ediləcək mallar üçün mülkiyyət, icarə və ya digər əşya hüquqları əsasında istifadə olunan və (və ya) vergi orqanlarında təsərrüfat subyekti (obyekti) kimi uçota alınmış malların saxlanılacağı (boşaldılacağı) yer barədə məlumatların vergi orqanına təqdim edilməsi ilə bağlı müddəa ləğv olunub.

Eyni zamanda, vergi ödəyicisinin vergi orqanında uçota alınmış bir və ya bir neçə təsərrüfat subyekti (obyekti) olduğu təqdirdə, bu maddədə nəzərdə tutulan məlumat forması vergi orqanına təqdim edilmir. Bu halda, idxal edilmiş mallar həmin təsərrüfat subyektinə (obyektinə) və ya təsərrüfat subyektlərinə (obyektlərinə) boşaldılmış hesab olunur. Bu maddənin tələbləri qeyri-sahibkarlıq və şəxsi istifadə üçün idxal olunan mallara münasibətdə şamil edilmir.

Buna əsasən, malların topdan satışını həyata keçirən vergi ödəyicisinin vergi orqanında uçota alınmış iki təsərrüfat subyekti (obyekti) olduğu təqdirdə, vergi ödəyicisi tərəfindən öz fəaliyyəti üçün idxal olunmuş malların saxlanılacağı (boşaldılacağı) yer barədə məlumatların vergi orqanına təqdim edilməsi nəzərdə tutulmur və bu halda, idxal edilmiş mallar həmin təsərrüfat subyektlərinə (obyektlərinə) boşaldılmış hesab olunur.