az
en
ru
tr
🔹*Bank əmanətləri üzrə faiz gəlirləri.* Fiziki şəxslərin milli valyutada 18 ay və daha artıq müddətə yerləşdirdiyi, məbləği 18 aydan tez qaytarılmayan əmanətlər üzrə faiz gəlirlərinin tam vergidən azadolmasının müddəti bitir. Hər bank üzrə aylıq faiz gəlirinin 200 manatadək hissəsinə aid ayrıca azadolma isə müddətsizdir. (102.1.22-3 və 102.1.22-4)
🔹 *Mikro sahibkarların sosial sığorta ödənişləri.* Fiziki şəxs olan mikro sahibkarların özlərinə görə ödədikləri məcburi dövlət sosial sığorta haqqının 25 faizini hesablanmış gəlir və ya sadələşdirilmiş vergidən çıxmaq imkanı başa çatır. (152.3 və 221.1-1)
🔹 *Kənd təsərrüfatı istehsalçıları.* Hüquqi şəxslərin istehsaldan əldə etdikləri mənfəətin, istehsalçıların öz məhsullarının satış dövriyyəsinin ƏDV-dən və hasilatının sadələşdirilmiş vergidən, həmin fəaliyyətdə istifadə olunan əmlakın isə əmlak vergisindən azadolmasının müddəti bitir. Hüquqi şəxslərin bu fəaliyyət üzrə satışdankənar gəlirləri və subsidiyaları, həmçinin iştirakçıların bu sahə üzrə dividend gəlirləri üçün nəzərdə tutulmuş müddətli azadolmalar da tamamlanır. (102.1.11-1, 106.1.14, 106.1.14-1, 164.1.18, 199.9 və 218-1.1.1)
🔹 *Buğda, un, çörək və ət.* Buğdanın idxalı və satışı, buğda ununun və çörəyin istehsalı və satışı, habelə qanunda nəzərdə tutulan heyvan və quş ətinin satışı üzrə ƏDV azadolmalarının müddəti bitir. Siyahısı təsdiqlənmiş yem və yem əlavələrinin satışına aid ƏDV güzəşti də tamamlanır. (164.1.27, 164.1.37 və 164.1.46)
🔹 *Kənd təsərrüfatı məhsullarının ticarəti.* Müəyyən edilmiş şərtlərlə yerli və xarici mənşəli kənd təsərrüfatı məhsullarının topdan və pərakəndə satışında ƏDV-nin ticarət əlavəsindən hesablanmasına aid beşillik xüsusi qaydanın müddəti başa çatır. Xarici mənşəli balıq məhsulları bu qaydaya daxil deyil. (153.3, 159.1, 174.4 və əlaqəli 175.12)
🔹 *Tibbi xidmətlər.* İcbari tibbi sığorta fondunun və qanunda göstərilən fondların vəsaiti hesabına göstərilən tibbi xidmətlərin, eləcə də tədris bazası kimi fəaliyyət göstərən tibb müəssisələrinin xidmətlərinin ƏDV-dən azadolma müddəti bitir. Tibbi xidmətlər üzrə qanunun tələblərinə uyğun POS-terminal ödənişlərindən formalaşan dövriyyənin 50 faizinin ƏDV tutulan dövriyyədən çıxılması güzəşti də tamamlanır. (164.1.51, 164.1.51-1 və 174.5)
🔹 *Regionlardakı hotellər və sanatoriyalar.* Bakı, Sumqayıt, Xırdalan və Abşeron rayonu istisna olmaqla, digər şəhər və rayonlarda, o cümlədən Naxçıvanda hotel və sanatoriya fəaliyyətində yerləşmə vasitəsi kimi istifadə olunan daşınmaz əmlaklara görə əmlak vergisinin 75 faiz azaldılması güzəşti bitir. (199.21)
🔹 *Elektrik nəqliyyatı.* Elektrik avtomobilləri üçün ikinci və üçüncü səviyyə enerji doldurucularının idxalı və satışı üzrə ƏDV azadolması tamamlanır. Sənaye parkı rezidentlərinin müəyyən şərtlərlə elektrik avtobuslarını yığım məqsədilə idxalına və yığımdan sonra satışına aid birillik ƏDV güzəşti də bitir. (164.1.41 və 164.1.41-2)
🔹 *Zərgərlik və motosiklet idxalı.* Zərgərlik istehsalı və emalı üçün təsdiqedici sənəd əsasında avadanlığın idxalına aid ƏDV azadolması bitir. Müəyyən qiymətli metalların, zərgərlik məmulatlarının və almazın idxalına, həmçinin mühərrikinin işçi həcmi 125 kubsantimetrdən çox olmayan motosikletlərin idxalına aid aksiz azadolmalarının müddəti də tamamlanır. (164.1.54, 188.1.7 və 188.1.8)
🔹 *Digər müddətli azadolmalar.* Formula 1 və Formula 2 üzrə müəyyən mal, iş, xidmət və royalti əməliyyatlarına, svop çərçivəsində xam neft və təbii qaz idxalına, bəzi publik hüquqi şəxslərin büdcə vəsaiti hesabına göstərdiyi iş və xidmətlərə aid azadolmalar da bitir. (106.1.28, 164.1.48, 164.1.49 və 164.1.62)
🔹 *Beynəlxalq yükdaşımalar.* Qanunda göstərilən dəmir yolu stansiyaları ilə ən yaxın gömrük sərhəd buraxılış məntəqələri arasında yük daşınması zamanı xarici yük avtomobillərinə tətbiq olunan yol vergisi azadolmasının müddəti başa çatır. (212-1.1)
Müddətlər uzadılacaqsa, bunu əvvəlcədən bilmək lazımdır. Uzadılmayacaqsa, yaranacaq əlavə vergi yükünü də indidən hesablamaq lazımdır.
Qeyd: İlin sonunadək güzəştlərin müddətləri uzadıla və ya şərtləri dəyişdirilə bilər.