Vergi orqanı hansı hallarda ƏDV depozit hesabı üzrə sərəncam verə bilər?

Vergi Məcəlləsinin 65.2.3-cü maddəsinə əsasən, vergi orqanı vergi ödəyicisinin ƏDV depozit hesabından yalnız ƏDV üzrə vergi borclarının dövlət büdcəsinə alınmasını təmin edir. ƏDV üzrə vergi borclarının ödənilməsi üçün ƏDV depozit hesabında vergi ödəyicisinin kifayət qədər vəsaiti olmadıqda, ƏDV üzrə vergi borclarının dövlət büdcəsinə alınması üçün həmin şəxsin digər hesablarına bu Məcəllədə nəzərdə tutulmuş qaydada sərəncam verilə bilər.
Maddədən də göründüyü kimi, ƏDV depozit hesabından digər vergilər üzrə yaranmış borcların ödənilməsinə icazə verilmir.
Mİsal 1. ƏDV ödəyicisinin əmək haqqıdan gəlir vergisi üzrə 600 manat borcu yaranıb. Vergi ödəyicisi həmin vergini 44 gündür ödəmir və bunun müqabilində faiz hesablanması da davam edir. Vergi ödəyicisinin ƏDV depozit hesabında 1000 manata qədər vəsait var. Bu zaman vergi orqanının əmək haqqıdan gəlir vergisı üzrə borc məbləğini ƏDV depozit hesabından tutmasına icazə yoxdur.
Mİsal 2. Vergi ödəyicisinin ƏDV üzrə 1200 manat borcu yaranıb. Vergi ödəyicisnin depozit hesabında 400 manat olduğundan vergi borcunun tam olaraq həmin hesabdan tutulmasına imkan yoxdur. Bu zaman vergi orqanı ƏDV üzrə qalıq borcunun tutulması üçün vergi ödəyicisinin cari bank hesabına sərəncam vermək hüququna malikdir.