Kassadan götürülən vəsait digər ödəyicinin hesabına qoyularsa....

Təcrübədə rast gəlinir ki, bir vergi ödəyicisi kassadan götürdüyü vəsaiti nağd formada ödəniş terminalı və ya bank vasitəsilə digər vergi ödəyicisinin bank hesabına nağd şəkildə həyata keçirir.

“Nağdsız hesablaşmalar haqqında” Azərbaycan Respublikası Qanununun 3.2-ci maddəsinə əsasən, hər iki tərəf vergi ödəyicisi olan şəxs arasında hesablaşmalar da yalnız bir şəxsin bank hesabından digər şəxsin bank hesabına köçürülməklə (o cümlədən, ödəniş alətləri (ödəniş kartları, ödəniş tapşırığı və s.) və ödəniş vasitələri (mobil telefon aparatları, komputer və digər avadanlıq)) ilə həyata keçirilən hesablaşmalar hesab edilir.

Azərbaycan Respublikasının Nazirlər Kabinetinin 30 sentyabr 2020-ci il tarixli, 365 nömrəli qərarı ilə “Vergi ödəyicilərində nağd pul vəsaitinin uçotu və kassa əməliyyatlarının aparılması” qaydasına əsasən, vergilərin, gömrük rüsumlarının, yığımların ödənilməsi və bank hesabına pul vəsaitinin mədaxil olunması üçün təhtəlhesab şəxslərə verilən pul vəsaitlərinin ümumi məbləği aylıq məxaric əməliyyatlarına aid edilmir.

Bu məntiqdən çıxış etsək, vergilərin, gömrük rüsumlarının, yığımların ödənilməsi və bank hesabına pul vəsaitinin mədaxil olunması istisna olmaqla digər vergi ödəyicilərinə ödəniş terminalı vasitəsilə və ya vergi ödəyicisinin bank hesabına vəsaitin nağd qoyulması hesabına olan ödənişlər aylıq limitin hesablanmasına zamanı nəzərə alınır və nağdsız ödəniş kimi qəbul olunmur.