Əmrlərin qeydiyyatı prosesi necə həyata keçirilməlidir?

Əmrlərin qeydiyyatının aparılması ilə bağlı bölmənin əvvəlində məlumat vermişik. Qeyd edək ki, təşkilatlarda əmrlər bəzən 3, bəzənsə 4 istiqamətdə qruplaşdırılsa da, bu sənədlərin iki istiqamətdə - təşkilatın əsas fəaliyyəti və işçi heyəti ilə bağlı təsnifləşdirilməsinə daha çox rast gəlinir. Təşkilatın əsas fəaliyyəti ilə bağlı əmrlər dedikdə, istehsalat-təsərrüfat, planlaşdırma, hesabatlıq, maliyyə, kredit, məhsul istehsalı və satışı, (xidmət), xarici iqtisadi əlaqələr, strukturun təkmilləşdirilməsi və müəsssisənin işinin təşkili ilə bağlı idarəetmə məsələlərini özündə əks etdirən əmrlər, işçi heyəti ilə bağlı əmrlər dedikdə isə, işçilərin işə qəbulu, işdən azad olunması, ezamiyyə, məzuniyyət, məzuniyyətdən geri çağırma, mükafatlandırma, tənbeh, kompensasiya və digər əmrlər nəzərdə tutulur.

Qeyd edək ki, qanunvericilikdə əmrlərin qeydiyyatı kitabının aparılması ilə bağlı tələblər var. Azərbaycan Respublikasının Əmək Məcəlləsinə görə, işəgötürən əmək müqavilələri ilə əlaqədar verilmiş əmrləri (sərəncamları, qərarları), habelə digər əmrləri (sərəncamları, qərarları) xüsusi kitab (jurnal) və ya komputer vasitəsilə xüsusi proqramla uçotunun qeydiyyatını aparmalıdır.

Məcəllənin tələbinə görə, işəgötürən məzuniyyətlərin verilməsinin uçotunu dürüst və vaxtında aparmağa borcludur. Məzuniyyətlərin verilməsinin uçotu işçilərin iş illəri, məzuniyyətlərin növləri, müddətləri, verildiyi vaxt və müvafiq əmrin (sərəncamın, qərarın) nömrəsi, tarixi göstərilməklə aparılmalıdır. Məzuniyyətlərin verilməsi işəgötürənin imkanlarına müvafiq olaraq kompüter proqramları və ya sadələşdirilmiş kargüzarlıq yolu ilə aparılır.

Əmrlərin uçotu qeyd etdiyimiz kimi ya iki kitabda (işçi heyəti və əsas fəaliyyət üzrə əmrlər), ya da ikidən çox kitabda aparıla bilər. Bütün hallarda, məsələn, məzuniyyətlə bağlı ayrıca qeydiyyat kitabının aparılması, yoxsa belə əmrlərin işçi heyəti ilə bağlı əmrlər kitabında qeyd olunması rəhbərliyin və kadrlarla iş şöbəsinin yanaşmasından və təşkilatda sənəd dövriyyəsinin həcmindən asılıdır.