Onlayn əmək müqaviləsində yeni dəyişikliklər əlavə sənəd kimi imzalanacaq?

Onlayn əmək müqaviləsində yeni dəyişikliklər əlavə sənəd kimi imzalanacaq?



Son dəyişikliklərədək əmək müqaviləsinə yeni dəyişiklik olunan zaman əmək müqaviləsinə dəyişiklik sənədi hazırlanaraq işçiyə imzalatdırılırdı. Doğrudur, 12 may 2023-cü il tarixdən tətbiq edilən ƏMAS alstistemində əmək müqaviləsinə dəyişiklik yeni əmək müqaviləsinin tərtibi yolu ilə həyata keçirilsə də, işəgötürənlər yalnız bəzi hallarda həmin elektron əmək müqaviləsini işçiyə imzalatdırılmasını təmin edirdilər. Son dəyişiklik nəticəsində Əmək Məcəlləsinin 46-cı maddəsinin 6-cı hissəsinə aşağıdakı məzmunda dördüncü cümlə əlavə edilib: “Elektron sənəd formasında bağlanılan əmək müqavilələrində dəyişiklik edildikdə, ilkin əmək müqaviləsi yenidən tərtib olunaraq təsdiq edilir.”

Əlavə edilən cümlədən göründüyü kimi, işəgötürən və işçi arasında bağlanan əmək müqaviləsində dəyişiklik zamanı artıq əmək müqaviləsinə əlavə yox, ilkin əmək müqaviləsi üzərindən yeni əmək müqaviləsi tərtib edilməlidir.

Misal. İşçi 10 yanvar 2024-cü il tarixdə əmək müqaviləsi bağladığı işçinin iş rejimini dəyişir. İşəgötürən və işçi arasında bağlanan əmək müqaviləsinə əsasən, işçi 1 sentyabr 2024-cü il tarixdən beşgünlük iş rejimdən altıgünlük iş rejiminə keçirilir. Bu zaman işçi və işəgötürən arasında əmək müqaviləsinə əlavə yox, 10 yanvar 2024-cü ildə bağlanan əmək müqaviləsi üzərindən yeni elektron əmək müqaviləsi imzalayacaq. Növbəti dəyişiklik olaraq işəgötürən və işçi arasında razılaşmaya əsasən, işçinin əmək haqqı 1 oktyabr 2024-cü il tarixdən artırlacaq. Bu zaman yenidən elektron əmək müqaviləsi hazırlandığı üçün həm 10 yanvar, həm də 1 sentyabr 2024-cü il tarixdən olan şərtlər nəzərə alınmaqla yeni elektron əmək müqaviləsi bağlanacaq.